Холи - яке аз ҷашнҳои қадимтарин ва машҳури мардуми Ҳиндустон ба шумор меравад. Онро одатан дар моҳи март, ҳангоми фарорасии баҳор ва анҷоми фасли зимистон таҷлил мекунанд. Холи рамзи эҳёи табиат, пирӯзии некӣ бар бадӣ ва дӯстиву ҳамдигарфаҳмӣ мебошад.Пайдоиши Холи бо ривоятҳои қадимаи ҳиндуӣ алоқаманд аст. Яке аз машҳуртарин ривоятҳо ба номи Ҳолика ва Прахлад вобаста мебошад, ки дар он пирӯзии имон ва ростӣ бар зулму бадӣ таҷассум ёфтааст. Ба хотири ин ривоят, шаби пеш аз Холи маросими «Ҳолика Даҳан» баргузор мегардад, ки дар он мардум гулхан меафрӯзанд. Ин гулхан рамзи нобудшавии бадӣ ва поксозии рӯҳу андеша мебошад.

Рӯзи асосии Холи бо номи «Рангвали Холи» машҳур аст. Дар ин рӯз одамон ба кӯчаҳо мебароянд, ба рӯй ва либоси ҳамдигар рангҳои гуногун (гулол) мепошанд, обпошӣ мекунанд, мерақсанд ва суруд мехонанд. Рангҳои равшан-сурх, зард, сабз, кабуд рамзи шодӣ, муҳаббат ва зиндагии нав мебошанд.

Холи ҷашни рангу шодӣ, дӯстиву баробарӣ ва оғози зиндагии нав аст. Он нишон медиҳад, ки фарҳанги мардуми Ҳиндустон ғанӣ ва рангоранг буда, суннатҳои қадимаро то имрӯз ҳифз намудааст. Ҷашни Холи паёми сулҳ, муҳаббат ва ҳамдигарфаҳмиро ба тамоми ҷаҳон мерасонад.