Роҳбарияти Донишгоҳ ба муносибати 35-солагии Истиқлоли давлатии Ҷумҳурии Тоҷикистон бо профессори кафедраи акушерӣ ва гинекологии №1, академик М.Ф. Додхоева мулоқот анҷом дода, саҳми ӯро дар рушди илми тиб, фаъолияти кафедра ва омода намудани мутахассисони ҷавон қадрдонӣ кард.

Мулоқот бо иштироки ҳамкорон ва шогирдони олим дар фазои самимӣ ва идона баргузор шуд. Намояндагони роҳбарияти Донишгоҳ ба академик Додхоева барои фаъолияти бисёрсолаи касбӣ, саҳми назаррас дар рушди кафедра ва тарбияи кадрҳои ҷавони соҳаи тиб изҳори сипос карданд.

Дар ҷараёни вохӯрӣ ба муносибати 35-солагии Истиқлоли давлатии Тоҷикистон ба академик Додхоева табрик гуфта шуда, ба ӯ саломатии бардавом, умри дароз ва дастовардҳои нави касбӣ ва илмӣ орзу карданд.

Иштирокдорони мулоқот таъкид карданд, ки чунин вохӯриҳо барои таҳкими анъанаҳои устодию шогирдӣ ва нигоҳ доштани пайванди наслҳо аҳамияти муҳим доранд. Ба гуфтаи онҳо, таҷриба, дониш ва сифатҳои инсонии устодони соҳибтаҷриба метавонанд барои мутахассисони ҷавон намунаи ибрат бошанд.

Қадршиносӣ

Фаъолияти илмӣ ва касбии М.Ф. Додхоева дар тӯли солҳои зиёд аз ҷониби мақомоти давлатӣ ва муассисаҳои соҳавӣ қадрдонӣ шудааст.

Ӯ соли 2004 бо медали «Барои хизмати шоиста», соли 2013 бо унвони «Аълочии тандурустии Тоҷикистон» ва соли 2014 бо унвони «Арбоби илм ва техникаи Тоҷикистон» сарфароз шудааст.

Додхоева ҳамчунин, чандин маротиба бо ифтихорномаҳои роҳбарияти Донишгоҳи давлатии тиббии Тоҷикистон ба номи Абуалӣ ибни Сино, таваллудхонаи №3 ва Кумитаи кор бо занон ва оилаи назди Президенти Ҷумҳурии Тоҷикистон қадрдонӣ шудааст.

Соли 2021 ӯ дар озмуни «ТОП-100 занони муваффақи Тоҷикистон» ғолиб гардид.

Мулоқотироҳбарияти Донишгоҳ бо академик Додхоева дар фазои гарм ва дӯстона анҷом ёфта, барои иштирокдоронаш ҳамчун нишонаи эҳтиром ба собиқаи илмӣ, меҳнати касбӣ ва нақши устодон дар омодасозии насли нави мутахассисони соҳаи тиб арзёбӣ шуд.

Кафедраи акушерӣ ва гинекологии №1