Ҳар сол бо омади фасли баҳор ва шукуфоии табиат, санаи муҳиме фаро мерасад, ки дар таърихи башарият бо ҳарфҳои зарин сабт шудааст. 9 май — Рӯзи Ғалаба дар Ҷанги Бузурги Ватанӣ. Ин ид барои ҳар як сокини Тоҷикистон ва кулли мардуми собиқ Иттиҳоди Шӯравӣ рамзи матонат, ватандӯстӣ ва пирӯзии адолат бар зулм мебошад.

Аз он рӯзи таърихӣ, ки садои тирҳои охирини ҷанг дар Аврупо хомӯш шуданд ва байрақи зафар бар фарози Рейхстаг афрохта шуд, 79 сол сипари мегардад. Ҷанги солҳои 1941-1945 мудҳиштарин ва хунинтарин набард дар таърихи инсоният буд. Фашизми гитлерӣ қасд дошт, ки миллатҳоро ғулом ва давлатҳоро нест кунад, аммо иродаи шикастнопазири халқҳо ин нақшаи шуми онҳоро барбод дод.

Мардуми шарифи Тоҷикистон аз рӯзҳои аввали ҷанг дар канор набуданд. Аз Тоҷикистони мо беш аз 300 ҳазор нафар ҷавонмардони шуҷоъ ба майдони набард рафтанд. Онҳо дар набардҳои шадиди назди Москва, Ленинград, Сталинград, Курск ва озод намудани давлатҳои Аврупо қаҳрамониҳои бемисл нишон доданд.

Беш аз 92 ҳазор нафар фарзандони Тоҷикистон дар ин ҷанг ҷони худро нисор карданд, ки номи онҳо дар саҳифаҳои "Китоби хотира" абадӣ боқӣ хоҳад монд. 54 нафар ҳамватани мо ба унвони баланди Қаҳрамони Иттиҳоди Шӯравӣ сазовор гаштанд.

Ғалаба на танҳо дар майдони ҷанг, балки дар ақибгоҳ низ ба даст омада буд. Занону кӯдакон ва пирони тоҷик дар киштукори пахта, корхонаҳои саноатӣ ва сохтмони иншооти муҳим шабу рӯз заҳмат мекашиданд. Шиори «Ҳама чиз барои фронт, ҳама чиз барои Ғалаба!» шиори ҳар як хонадони тоҷик буд. Тоҷикистон барои ҷанговарон либоси гарм, хӯрокворӣ ва лавозимоти ҷангӣ фиристода, ҳазорон нафар фирориён ва кӯдакони ятимро ба оғӯши худ гирифт.

Имрӯз, ки мо дар фазои сулҳу оромӣ ва Тоҷикистони соҳибистиқлол зиндагӣ дорем, бояд фаромӯш накунем, ки ин осоиштагӣ ба чӣ баҳое ба даст омадааст. Рӯзи Ғалаба барои насли ҷавон дарси бузурги худогоҳӣ ва ватандӯстист. Эҳтироми собиқадорони ҷанг ва меҳнат, ки имрӯз дар байни мо ангуштшумор мондаанд, қарзи инсонии ҳар як фард аст.

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамеша таъкид мекунанд, ки: «Ҷасорату мардонагии собиқадорони ҷанг барои мо мактаби бузурги тарбия ва намунаи олии хизмат ба Ватан мебошад».

9 май иди бошукӯҳ ва дар айни замон маҳзун аст. Мо дар ин рӯз ҳам хурсандӣ мекунем ва ҳам ба ёди шаҳидон ашк мерезем. Бигзор, дар ҷаҳон дигар ҳеҷ гоҳ ҷанг нашавад ва осмони Ватани азизи мо ҳамеша софу беғубор бошад.

Байбутаева А.М. Рамазонова И.М.Сафарова Ҳ.А.-омузгорони кафедраи забонҳои хориҷӣ