Санаи 19-уми марти соли 2025 ҳайати меҳмонон аз Донишгоҳи тиббии Синзяни Ҷумҳурии Мардумии Чин ба Пажӯҳишгоҳи тибби бунёдӣ ташриф оварданд. Меҳмононро директори Пажӯҳишгоҳ, доктори илмҳои тиб, профессор Саидзода Б.И. ба ҳузур пазируфт ва бо онҳо мулоқот анҷом дод.

Дар ҷараёни вохӯрӣ профессор Саидзода Б.И. меҳмононро бо таърихи таъсис, сохтор ва самтҳои асосии фаъолияти Пажӯҳишгоҳ шинос намуд. Вай зикр кард, ки Пажӯҳишгоҳи тибби бунёдӣ ба таҳқиқоти илмӣ, рушди усулҳои муосири ташхис ва табобат, ҳамчунин тарбияи мутахассисони баландихтисос машғул аст. Меҳмонон инчунин бо озмоишгоҳҳои муосир, таҷҳизоти тиббӣ ва равандҳои тадқиқотии ин муассиса шинос шуданд.

Зимни мулоқот ҷонибҳо масъалаҳои ҳамкорӣ дар соҳаҳои мухталиф, аз ҷумла табодули таҷриба, татбиқи лоиҳаҳои муштарак ва гузаронидани тадқиқоти илмии фаромарзиро баррасӣ намуданд. Профессор Саидзода Б.И. аҳамияти таҳкими робитаҳои илмӣ ва мубодилаи донишҳои навро таъкид карда, изҳор дошт, ки ҳамкориҳои байналмилалӣ дар пешбурди илм ва такмили малакаҳои касбӣ нақши муҳим мебозанд.

Меҳмонон аз сатҳи баланди ташкилоти илмӣ, имкониятҳои тадқиқотӣ ва иқтидори илмии Пажӯҳишгоҳ изҳори сипос намуданд. Ҷонибҳо ният доранд, ки робитаҳои илмӣ ва таълимиро таҳким бахшида, дар оянда барномаи ҳамкориҳои муштаракро амалӣ намоянд.

Ин ташриф барои густариши муносибатҳои байналмилалӣ ва рушди ҳамкориҳои илмӣ миёни ду муассисаи илмӣ заминаи мусоид фароҳам овард.