Ҳуқуқи инсон дар заминаи дастрасӣ ба хизматрасониҳои сил ва ВНМО ҷузъи муҳими муборизаи ҷаҳонӣ бо ин бемориҳо мебошад. Имрӯз, 4-уми декабри соли 2024, дар кафедраи фтизиопулмонологияи Донишгоҳи давлатии тиббии Тоҷикистон ба номи Абӯалӣ ибни Сино муҳокимаи масъалаҳои марбут ба таъмини дастрасии баробар ба хизматрасониҳои тиббӣ барои ҳамаи ниёзмандон баргузор гардид.

Дар доираи ин чорабинӣ донишҷӯёни гурӯҳи 6-уми курси 5-уми факултети педиатрия дар муҳокима, ки ба Рӯзи ҷаҳонии мубориза бар зидди ВНМО таҳти шиори «Ҳуқуқ ба саломатӣ – роҳи дуруст» бахшида шуда буданд, фаъолона иштирок карданд. Мавзӯи асосии муҳокима зарурати ҳифзи ҳуқуқҳои беморон барои ташхис, табобат ва пешгирии босифат ва бартараф намудани монеаҳо, ки иҷрои ин ҳуқуқҳоро душвор мегардонанд, буд.

Муҳокимаҳо ду ҷанбаи муҳимро дар бар гирифтанд:

1.            Стигма ва табъиз: иштироккунандагон қайд карданд, ки беморони гирифтори ВНМО ва сил баъзан вақт бо муносибатҳои пешдоварона рӯбарӯ мешаванд, ки дастрасии онҳоро ба кумаки зарурӣ душвор мегардонад.

2.            Монеаҳои иҷтимоӣ ва иқтисодӣ: масъалаҳои вобаста ба камбизоатӣ, норасоии иттилоот ва дурии ҷуғрофии муассисаҳои тиббӣ, ки барои бартараф намудани онҳо равиши низомӣ зарур аст, низ бо мутахассисони оянда муҳокима гардид.

Донишҷӯён таваҷҷӯҳи амиқро ба таҳияи роҳҳои нави ҳифзи ҳуқуқи инсон дар соҳаи тандурустӣ ва пешгирии бемориҳои сироятӣ нишон доданд. Муҳокимаҳо бо даъват барои минбаъд решакан намудани монеаҳо дар роҳи дастрасии умумӣ ба саломатӣ ва таблиғи ҳуқуқи беморон ба саломатӣ ҳамчун ҷузъи ҷудонашавандаи тибби муосир ба анҷом расиданд.

Кафедраи фтизиопулмонология